വ്യവസായ പാര്‍ക്കുകളിലെ വസ്തുനികുതി പിരിവ് നിര്‍ത്തും
തിരുവനന്തപുരം: സംസ്ഥാനത്തെ വ്യവസായ പാർക്കുകളിലെ വസ്തുനികുതി പിരിവ് തല്‍ക്കാലം നിർത്തിവെക്കും. ഇക്കാര്യം വ്യക്തമാക്കി തദ്ദേശ വകുപ്പ് ഉത്തരവ് പുറപ്പെടുവിച്ചു.
മന്ത്രിമാരായ പി. രാജീവും എം.ബി. രാജേഷും നടത്തിയ ചർച്ചയെ തുടർന്നാണ് നടപടി.
വ്യവസായ വകുപ്പിന്‍റെയും കെ.എസ്.ഐ.ഡി.സി, കിൻഫ്ര, സിഡ്കോ തുടങ്ങിയ സർക്കാർ ഏജൻസികളുടെയും കീഴിലുള്ള വ്യവസായ പാർക്കുകള്‍ക്ക് ഉത്തരവ് ബാധകമാണ്.
വ്യവസായ പാർക്കുകളിലെ വസ്തുനികുതി പിരിവ് സംബന്ധിച്ച്‌ വ്യവസായ വാണിജ്യ ഡയറക്ടറും തദ്ദേശ വകുപ്പ് പ്രിൻസിപ്പല്‍ ഡയറക്ടറും സർക്കാറിന് സംയുക്ത റിപ്പോർട്ട് സമർപ്പിച്ചിരുന്നു.
റിപ്പോർട്ടിന്‍റെ അടിസ്ഥാനത്തില്‍ 1994 ലെ കേരള പഞ്ചായത്തീരാജ് നിയമത്തില്‍ ഭേദഗതി കൊണ്ടുവരുന്നത് സർക്കാർ പരിശോധിക്കുകയാണ്. ഈ ഭേദഗതി നടപ്പില്‍ വരുന്നതുവരെയാണ് വ്യവസായ ഏരിയ, എസ്റ്റേറ്റ്, പ്ലോട്ട് എന്നിവിടങ്ങളിലെ നികുതി പിരിവ് നിർത്തുക.
