പെരുമ്പാവൂരില് അതിഥി തൊഴിലാളിയെ കുത്തിക്കൊന്നു; പ്രതി ഓടി രക്ഷപ്പെട്ടു
കൊച്ചി| പെരുമ്പാവൂര് വട്ടക്കാട്ട്പടിയില് അതിഥി തൊഴിലാളിയെ കുത്തിക്കൊലപ്പെടുത്തി. ഒഡിഷ സ്വദേശി ആകാശ് ഡിഗല് (34) ആണ് കൊല്ലപ്പെട്ടത്. രാവിലെ ഏഴരയോടെയായിരുന്നു സംഭവം. ആകാശ് വട്ടയ്ക്കാട്ടുപടി എസ്എന്ഡിപിക്ക് സമീപം കുടുംബമായി വാടകയ്ക്ക് താമസിച്ചു വരികയായിരുന്നു. നെടുംപുറത്ത് ബിജുവിന്റെ വാടക കെട്ടിടത്തിലാണ് ഇവര് താമസിച്ചുവന്നത്.
ഇതേ കെട്ടിടത്തില് താമസിച്ചിരുന്ന ഒഡിഷ സ്വദേശി അഞ്ജന നായിക് വാക്കുതര്ക്കത്തിനിടെ ആകാശ് ഡിഗലിനെ കുത്തുകയായിരുന്നു. സംഭവ ശേഷം ഇയാള് ഓടി രക്ഷപ്പെട്ടു.
പരുക്കേറ്റ ആകാശിനെ ഉടന് താലൂക്ക് ആശുപത്രിയില് എത്തിച്ചെങ്കിലും മരണം സംഭവിച്ചു.
മൃതദേഹം പെരുമ്പാവൂര് താലൂക്ക് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്. പെരുമ്പാവൂര് പോലീസ് സ്ഥലത്തെത്തി അന്വേഷണം ആരംഭിച്ചു. പ്രതിക്കായി തിരച്ചില് ഊര്ജ്ജിതമാക്കിയതായി പോലീസ് അറിയിച്ചു.
