പുതുക്കാട് യുവതിയുടെ ആത്മഹത്യ; ഭര്‍ത്താവിനെതിരെ ആരോപണവുമായി ബന്ധുക്കള്‍, കേസെടുത്തു
തൃശൂർ: തൃശൂർ പുതുക്കാട് യുവതിയുടെ ആത്മഹത്യയില്‍ ഭർത്താവിനെതിരെ കേസ്. ഒന്നര മാസം മുൻപ് ബന്ധുവിന്റെ വീട്ടില്‍ വെച്ച്‌ ആത്മഹത്യക്ക് ശ്രമിച്ച അനഘ അശോകൻ ഇന്നലെയാണ് മരിച്ചത്.
ഭർത്താവ് ആനന്ദ് അനഘയെ മാനസികമായി പീഡിപ്പിച്ചിരുന്നുവെന്ന് ബന്ധുക്കള്‍ ആരോപിക്കുന്നു. ആത്മഹത്യശ്രമത്തിന് പിന്നാലെ ബന്ധുക്കളുടെ പരാതിയില്‍ ഭർത്താവിനെതിരെ നേരത്തെ തന്നെ പുതുക്കാട് പൊലീസ് കേസെടുത്തിരുന്നു.
വിവാഹനിശ്ചയത്തിന് ശേഷം അനഘയ്ക്ക് ടെക്നോപാര്‍ക്കില്‍ ജോലി കിട്ടിയിരുന്നെങ്കിലും ആനന്ദ് അനഘയെ ജോലിക്ക് പോകാന്‍ അനുവദിച്ചിരുന്നില്ലെന്ന് ബന്ധുക്കള്‍ പറയുന്നു. പ്രണയത്തിലായിരുന്ന ഇവർ ഈ വർഷം ജനുവരിയില്‍ തന്നെ വിവാഹം കഴിച്ചിരുന്നതായും രഹസ്യ വിവാഹം നടന്നിരുന്നുവെന്ന കാര്യം ആത്മഹത്യശ്രമത്തിനു പിന്നാലെയാണ് അനഘയുടെ കുടുംബം അറിയുന്നത്. ഒന്നര മാസം മുൻപ് ബന്ധുവീട്ടില്‍ വെച്ചായിരുന്നു യുവതി ആത്മഹത്യക്ക് ശ്രമിച്ചത്. ആശുപത്രിയില്‍ ചികിത്സയിലായിരുന്ന അനഘ ഇന്നലെ മരണത്തിന് കീഴടങ്ങുകയായിരുന്നു. നിലവില്‍ ബന്ധുക്കളുടെ പരാതിയില്‍ ഭർത്താവിനെതിരെ പൊലീസ് കേസെടുത്തു.
