'വികസനം കുഴികളോടൊപ്പം' ഹാഷ് ടാഗ്: മുംബൈയില് വേറിട്ട പ്രതിഷേധവുമായി കോണ്ഗ്രസ്
മുംബൈ: മുംബൈ നഗരത്തിലെ റോഡുകളുടെയും ഡ്രെയിനേജുകളുടെയും ശോച്യാവസ്ഥക്കെതിരെ യൂത്ത് കോണ്ഗ്രസ് നടത്തിയ വേറിട്ട പ്രതിഷേധം ശ്രദ്ധേയമായി.
റോഡിലെ കുഴികള്ക്കുചുറ്റം വൃത്താകൃതിയില് അടയാളപ്പെടുത്തി അതിനരികെ 'വികസനം' എന്നെഴുതി ബ്രിഹൻ മുംബൈ മുനിസിപ്പല് കോർപറേഷൻ (ബി.എം.സിയെ) ടാഗ് ചെയ്താണ് പ്രതിഷേധം. മുംബൈ യൂത്ത് കോണ്ഗ്രസ് വർക്കിംഗ് പ്രസിഡന്റ് സുഫിയാൻ ഹൈദർ ആണ് ഈ സമരരീതി ആരംഭിച്ചത്.
അന്ധേരിയിലെ വിവിധ പ്രദേശങ്ങളില് നിന്നാണ് സമരം തുടങ്ങിയത്. യൂത്ത് കോണ്ഗ്രസ് ദേശീയ സെക്രട്ടറി പ്രിയങ്ക സനാപിന്റെ നേതൃത്വത്തിലാണ് പ്രതിഷേധം സംഘടിപ്പിച്ചത്. ദിൻദോഷിയിലും വീര ദേശായി റോഡിലും പശ്ചിമ അന്ധേരിയിലെ മറ്റ് പ്രദേശങ്ങളിലും കുഴികള് അടയാളപ്പെടുത്തി. ഒരാഴ്ചയ്ക്കുള്ളില് ഈ സമരരീതി മുംബൈയിലുടനീളം വ്യാപിപ്പിക്കാനാണ് തീരുമാനം. റോഡുകളിലെ കുഴികള് നികത്തുന്നതില് ബി.എം.സിക്ക് കാര്യക്ഷമതയില്ലെന്ന് ആരോപിച്ചാണ് മുംബൈ യൂത്ത് കോണ്ഗ്രസ് പ്രചാരണം കൊഴുപ്പിച്ചത്.
പ്രചാരണം തുടങ്ങിയതോടെ യൂത്ത് കോണ്ഗ്രസ് അടയാളപ്പെടുത്തിയ കുഴികള് അന്ധേരിയില് ബി.എം.സി നികത്താൻ തുടങ്ങി. മുംബൈ നഗരത്തില് മുഴുവനായും ഇതേ രീതിയിലുള്ള പ്രതിഷേധം സംഘടിപ്പിക്കുന്നുണ്ട്. മുംബൈയെ കുഴിമുക്തമാക്കുമെന്ന വാഗ്ദാനങ്ങള് പാലിക്കുന്നതില് സർക്കാർ പരാജയപ്പെട്ടുവെന്ന ആരോപണവും പ്രതിഷേധക്കാർ ഉന്നയിക്കുന്നുണ്ട്.
