കെ എസ് ആര്‍ ടി സിയിലെ പൊതുശൗചാലയങ്ങളിലെ വൃത്തിഹീനത; കരാറുകാര്‍ക്കെതിരെ നടപടി വരുന്നു
തിരുവനന്തപുരം | വിവിധ കെഎസ്ആര്‍ടിസി ബസ്റ്റാന്റുകളിലെ വൃത്തിഹീനമായ ശൗചാലയങ്ങള്‍ക്കെതിരെ നടപടിക്ക് നിര്‍ദേശം. ഇത്തരം ശൗചാലയങ്ങളുടെ നടത്തിപ്പുകാര്‍ക്കെതിരെയാണ് നടപടിക്ക് നിര്‍ദേശം.സംസ്ഥാനത്തെ വിവിധ കെഎസ്ആര്‍ടിസി യൂണിറ്റുകളിലെയും ബസ്റ്റാന്‍ഡുകളിലെയും ശൗചാലയങ്ങളുടെ പരിപാലനം പരിശോധിക്കാന്‍ ഗതാഗത മന്ത്രി നിര്‍ദ്ദേശം നല്‍കിയിരുന്നു. ഇതേതുടര്‍ന്നുള്ള പരിശോധനയിലാണ് ശൗചാലയം നടത്തിപ്പിന് കരാര്‍ എടുത്തിരുന്നവര്‍ക്കെതിരെ നടപടിയ്ക്ക് നിര്‍ദേശം നല്‍കിയത്.
കെഎസ്ആര്‍ടിസി ചെയര്‍മാന്‍ ആന്‍ഡ് മാനേജിംഗ് ഡയറക്ടര്‍ കെഎസ്ആര്‍ടിസിയുടെ ചില ബസ് സ്റ്റാന്‍ഡുകള്‍ സന്ദര്‍ശിച്ചതില്‍ ശൗചാലയങ്ങളില്‍ മാനദണ്ഡം അനുസരിച്ചുള്ള ശുചീകരണ പ്രവര്‍ത്തനങ്ങളോ പരിപാലനമോ നടക്കുന്നില്ല എന്നും കണ്ടെത്തി. കെഎസ്ആര്‍ടിസിയുടെ കോട്ടയം, തിരുവല്ല യൂണിറ്റുകളിലെ ശൗചാലയം നടത്തിപ്പിനുളള കരാര്‍ ഉടമ്പടിയിലെ ശുചീകരണ പ്രവര്‍ത്തനങ്ങളിലെ പല വ്യവസ്ഥകളും പാലിക്കുന്നില്ലെന്നും അധികൃതര്‍ക്ക് ബോധ്യപ്പെട്ടു.യാത്രക്കാരെ ബാധിക്കുന്ന ഇത്തരം വിഷയങ്ങളില്‍ കുറച്ചുകൂടി ഗൗരവകരമായ സമീപനം കൈക്കൊള്ളണമെന്നും കേരളത്തിലെ എല്ലാ യൂണിറ്റുകളിലും ഇത്തരത്തിലുള്ള മിന്നല്‍ പരിശോധനകള്‍ കര്‍ശനമാക്കണമെന്നും സി എം ഡി നിര്‍ദ്ദേശം നല്‍കിയിട്ടുണ്ട്.
