മാസപ്പടി കേസ്: വിജിലന്സ് വേണ്ട കോടതി നേരിട്ട് അന്വേഷിച്ചാല് മതിയെന്ന് കുഴല്നാടന്;
തിരുവനന്തപുരം | മാസപ്പടി കേസില് മലക്കം മറിഞ്ഞ് മാത്യു കുഴല്നാടന് എംഎല്എ. വിജിലന്സ് അന്വേഷണത്തിന് ഉത്തരവ് ഇടണമെന്നായിരുന്നു നേരത്തെ കുഴല്നാടന്റെ ആവശ്യമെങ്കില് ഇപ്പോള് കോടതി നേരിട്ട് അന്വേഷിച്ചാല് മതിയെന്നാണ് കുഴല്നാടന് അറിയിച്ചത്.വിജിലന്സ് അന്വേഷണം ആവശ്യപ്പെട്ട് സമര്പ്പിച്ച ഹരജി പരിഗണനയ്ക്ക് എടുത്തപ്പോഴായിരുന്നു മാത്യു കുഴല്നാടന്റെ നിലപാട് മാറ്റം. മാത്യു കുഴല്നാടന്റെ നിലപാട് മാറ്റത്തില് അതൃപ്തി അറിയിച്ച കോടതി ഏതെങ്കിലും ഒന്നില് ഉറച്ചു നില്ക്കൂ എന്ന് കോടതി കുഴല്നാടനോട് വാക്കാല് ആവശ്യപ്പെട്ടു. കോടതി ഇന്ന് വിധി പ്രസ്താവിക്കാനിരിക്കെയാണ് മാത്യു കുഴല്നാടന്റെ നിലപാട് മാറ്റം.
കേസില് കോടതിയുടെ നേരിട്ടുള്ള അന്വേഷണം മതിയെന്നാണ് ഇന്ന് മാത്യു കുഴല്നാടന്റെ അഭിഭാഷകന് കോടതിയെ അറിയിച്ചത്. അതേ സമയം, നിലപാടു മാറ്റത്തിലൂടെ ഹരജി രാഷ്ട്രീയ പ്രേരിതമാണെന്ന് വ്യക്തമായെന്നും, ഹരജി തള്ളണമെന്നും വിജിലന്സ് പ്രോസിക്യൂട്ടര് ആവശ്യപ്പെട്ടു. തുടര്ന്ന് ഉത്തരവ് പുറപ്പെടുവിക്കുന്നതിനായി കേസ് ഈ മാസം 12 ലേക്ക് മാറ്റി.ധാതു മണല് ഖനനത്തിനായി സിഎംആര്എല് കമ്പനിക്കു അനുമതി നല്കിയതിനു പ്രതിഫലമായി മുഖ്യമന്ത്രിയുടെ മകള്ക്ക് മാസപ്പടി ലഭിച്ചുവെന്നാണ് ഹരജിയിലെ ആരോപണം. മുഖ്യമന്ത്രി, മകള് ഉള്പ്പെടെ ഏഴ് പേര്ക്കെതിരെയാണ് മാത്യു കുഴല്നാടന് എംഎല്എ ഹര്ജി ഫയല് ചെയ്തത്. ഫെബ്രുവരി 29നാണ് മാത്യു കുഴല്നാടന് ഹരജി സമര്പ്പിച്ചത്.
