ലോറിയില്‍ നിന്നും കരിങ്കല്ല് വീണ് മരിച്ച അനന്തുവിന്റെ കുടുംബത്തിന് അദാനി ഗ്രൂപ്പ് ഒരു കോടി നല്‍കും
തിരുവനന്തപുര | വിഴിഞ്ഞം തുറമുഖ നിര്‍മ്മാണത്തിന് കരിങ്കല്ലുമായി പോയ ലോറിയില്‍ നിന്നും കരിങ്കല്ല് തെറിച്ചുവീണ് മരിച്ച വിദ്യാര്‍ഥി അനന്തുവിന്റെ കുടുംബത്തിന് ധനസഹായം പ്രഖ്യാപിച്ച് അദാനി ഗ്രൂപ്പ്. ഒരു കോടി രൂപ സഹായം നല്‍കാമെന്ന് അദാനി ഗ്രൂപ്പ് കുടുംബത്തെ അറിയിച്ചു. അനന്തുവിന്റെ വീട്ടില്‍ നേരിട്ടെത്തിയാണ് അദാനി പോര്‍ട്ട് അധികൃതര്‍ ഇക്കാര്യം അറിയിച്ചത്.
നെയ്യാറ്റിന്‍കര നിംസ് മെഡിസിറ്റിയിലെ നാലാം വര്‍ഷ ബിഡിഎസ് വിദ്യാര്‍ഥിയായിരുന്നു അനന്തു. മുക്കോല-ബാലരാമപുരം റോഡില്‍ മണലിവിള മുള്ളുമുക്കിലാണ് അപകടം നടന്നത്. കോളജില്‍ പോകാനായി ബാലരാമപുരത്തേക്ക് സ്‌കൂട്ടറില്‍ പോവുകയായിരുന്ന അനന്തുവിന്റെ ദേഹത്തേക്ക് എതിര്‍ ദിശയില്‍ നിന്നുവരികയായിരുന്ന ലോറിയില്‍ നിന്നും കരിങ്കല്ല് പതിക്കുകയായിരുന്നു
അദാനി തുറമുഖത്തിനായി ടെട്രാപോഡ് നിര്‍മ്മിക്കുന്ന കേന്ദ്രത്തിന് മുന്നിലെ റോഡിലെ കുഴിയില്‍ വീണപ്പോഴാണ് ലോറിയില്‍ നിന്നു കരിങ്കല്ല് തെറിച്ചത്. ഗുരുതരമായി പരുക്കേറ്റ അനന്തുവിനെ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല
