ചങ്ങരംകുളം:ചിയ്യാനൂർ ചിറകുളത്തിനോട് ചേർന്ന് മുൻ സ്പീക്കറും പൊന്നാനി എംഎൽഎ യും ആയിരുന്ന പി ശ്രീരാമകൃഷ്ണൻ അനുവദിച്ച 25 ലക്ഷം രൂപയും
ബ്ലോക്ക് പഞ്ചായത്തിന്റെ 3 ലക്ഷം രൂപയും പഞ്ചായത്തിന്റെ 2 ലക്ഷം രൂപയും ഉപയോഗപ്പെടുത്തി നിർമിക്കുന്ന പഞ്ചായത്തിലെ ആദ്യത്തെ ഹാപ്പിനെസ്സ് പാർക്ക് വ്യാഴാഴ്ച പൊതുജനങ്ങൾക്കായി തുറന്ന് കൊടുക്കും.മാർച്ച് 7 വ്യാഴാഴ്ച കാലത്ത് 10.30 ന് വഖഫ്, കായിക വകുപ്പ് മന്ത്രി വി അബ്ദുറഹിമാൻ പാർക്കിന്റെ ഉൽഘാടനം നിർവഹിക്കും.പൊന്നാനി എംഎൽഎ പി നന്ദകുമാർ അധ്യക്ഷത വഹിക്കുന്ന ചടങ്ങിൽ പെരുമ്പടപ്പ് ബ്ളോക്ക് പ്രസിഡണ്ട് അഡ്വക്കറ്റ് ഇ സിന്ധു സ്വാഗതം പറയും.ഗ്രാമപഞ്ചായത്ത് പ്രസിഡണ്ട് കെവി ഷെഹീർ ആശംസകൾ അറിയിച്ച് സംസാരിക്കും.മറ്റു പഞ്ചായത്ത് ജില്ലാ,ബ്ളോക്ക് മെമ്പർമാർ രാഷ്ട്രീയ സാംസ്കാരിക സാമൂഹിക രംഗത്തെ പ്രമുഖരും നാട്ടുകാരും ചടങ്ങിൽ പങ്കെടുക്കും.തിരക്ക് പിടിച്ച ജീവിത സാഹചര്യങ്ങളിൽ കുട്ടികളും കുടുംബവും ഒത്ത് അൽപ്പ സമയം ചേർന്നിരിക്കാൻ സാധിക്കുന്ന പഞ്ചായത്തിലെ ഏറ്റവും മനോഹരമായ ഒരിടമായി പാർക്ക് മാറുമെന്ന് പദ്ധതിക്ക് നേതൃത്വം നൽകിയ വാർഡ് മെമ്പർ അബ്ദുൽ മജീദ് പറഞ്ഞു.